A Plataforma Galiza pola Paz foi presentada públicamente o día 2 de abril de 2025 polas organizacións que aderen ao manifesto «Galiza pola Paz». Ten como precedente a Plataforma Galega contra a OTAN, xurdida en 2022 para dar resposta de país á cimeira da OTAN en Madrid, e reformúlase agora cun carácter máis abranxente e máis urxente, ante os anuncios de investimentos militares e a escalada belicista.

O obxectivo principal da Plataforma Galiza pola Paz é a loita por un futuro de paz para Galiza fronte á dinámica belicista imposta polo imperialismo e fronte ás políticas de rearmamento que pretenden a Unión Europea e o Estado español. 

Ademáis, a Plataforma rexeita o uso de infraestruras e equipamentos en territorio galego para dar soporte á OTAN, a entrega colonial de recursos naturais galegos para alimentar a maquinaria militar e o intento de facer pasar o expolio destes recursos como unha política de reindustrialización. 

A Plataforma prevé unha serie de actividades e accións divulgativas da verdadeira ameaza que constitúen os discursos militaristas, e fai un chamamento ao pobo galego a mobilizarse contra o militarismo, contra a OTAN e contra a guerra, e ás entidades e organizacións do tecido social do país a adherir á Plataforma.